تخاريف :: اعلانات ::x اعلانات:: موضوع ساخن جدا ((::: اتحدى الملل:::))

بسم الله الرحمن الرحيم

ملوحوظة::: قبل مانبدا فى ناس بتزعل من طريقتى فى الحوار

بس الحقيقة مواضيعى بتكون مضحكة لكن مبنية على اساس هادف

وطبعا محدش يزعل من الموضوع دع لانه ((( هزاار X هزاار))

طبعا فى اسباب كتيره مش بتخلى الواحد يعرف يدخل المنتدى ..

حتى لو دخله مش بشاركك بمواضيع

طب ايه هى الاسباب

طبعا الدراسه والامتحانات

تانى حاجه الاكتئاب

ثالثا : الملل

انا وانا بكتب الموضوع ده اتفقت مع نفسي انى هكتبه بكل صراحة
كل الظروف السابقة دي من اول ( 1 الي 3 ) ممكن نتجاوزها لانها مش جديدة عليه ،،
يعني بالكتير 70% من سبب غيابي ..
لكن 30% ودي نسبة مش قليلة خاصة لو قلنا ان انا قادر على استغلال كل ثانية من وقتي ،، هي الملل فعلا
انا فعلا حاسس بملل رهيب من النت
ومن المنتديات
من الكمبيوتر كله على بعضه ..
فيه ناس شمتانة ..
فيه ناس متضايقة ..
وفيه ناس مستغربة ،، هو انت جاي تزهق من النت بعد 4 سنين !!
يا جماعه ببساطة انا مازهقتش منه بالدرجة اللى تخليني اكرهه ،، وانى ابطل ادخل ..
لكن المرحلة دي بيعدي بيها اى واحد بيتعامل مع جماد زي الكمبيوتر
وتفهم الحالة دي كويس قوي ناس كتيرة من نوعيتي ،،
يقولك انا بتجيلي فترة مش طايق ابص فى وش الكمبيوتر ..
الانسان بطبيعته ملول وبيزهق بسرعة حتي لو بيتعامل مع عالم من العشوائية ،،
فمابالنا لما يتعامل مع عالم كله جمود
ارقام وحسابات
رموز و حروف
ازرار وكابلات
كل حاجة ليها قواعد وقوانين صارمة صعبة الاختراق او التغيير او الحيد عنها ،،

الفترة الاخيرة دي كنت بفتح ايميلي وماببقاش فى البيت اساسا ،،
وبرجع كنت بلاقي ناس بتصوت ع الايميل وكلام كتير ماكنتش بلحق اقري منه الا

( انت هنا )
( Just Forget It .. just sent you a nudge. ) :
( انت ياعم ) :
( انت يا ابني ) ::
( موجود ) :
( ازيك يا كريم ؟)
( aLone just sent you a nudge. )
( امة لا اله الا الله just sent you a nudge )

لانى غالبا بقفل الويندو من غير ماقري ولا حرف ،،

كل حاجة فى الكون ليها قوانين ،،
وماحدش يقولي لا مافيش حاجة اسمها كل حاجة ليها قوانين
لا القوانين نفسها فيه قوانين وضعتها ،،
العشوائية نفسها ليها قوانين تحكمها ..
الخروج عن القاعدة هي قاعدة فى حد ذاتها ،،
علشان كده انا مليت ..

تعرفوا .. ؟

من حوالي مده كده لما كنت مندمج قوي فى كتباتى
وقتي وجهدي وتفكيري ومخي وكل حاجة مديهاله ..
ماكنتش بحس بالوقت ابدا
كان النهار و اليل بالنسبة لي مابيتعدوش
فجأة النهاردة انتهي
وبكرة بدأ
وبعد بكرة هتطلع شمسه كمان دقايق ..

زمان سألوا العبقري الالماني البرت اينشتاين عن تفسير بسيط للنظرية النسبية ،،
قالهم لما تيجي تعمل حاجة انت بتحبها ،، بتحس ان الوقت بيجري بيك بسرعة
ولما تيجي تعمل حاجة انت كارهها تحس ان الوقت تقيل ..
دلوقتي انا كاره الكمبيوتر والنت .. ( فترة و هتعدي )
علشان كده بحس بقيمة اليوم فعلا 24 ساعة كل ساعة تنطح اختها ،،

الناس لما بتحس بزهق انواع ،،
فيه ناس بتدخل تنام والنوعية دي انا اخر واحد ممكن ينضملها ،،
فيه ناس بتحط همها فى الاكل ،، ودول انا ابعد مايكون عن انى اكون معاهم ..
فيه ناس بتنزل تتمشي فى الشوارع ،،
فيه ناس بتدور على اى ناس ترغي معاهم ،،

انا بقي من ضمن الفئة الخامسة اللى مش موجودة فى ال 4 اللى فوق ،،
بتفرج ع التليفزيون !!

طيب هتتفرج على ايه يا كيمو ،،
افلام ؟
عربي : تخلف × جهل × فى استفزاز ..
اجنبي : معظمها سواء بقي رومانسية اكشن عفاريت زرق تعتبر خيال علمي
طبعا ماننساش ان المجد لامريكا .. ويخربيتنا يا شيخ اننا معكنين على الامريكان عيشتهم ،،

مسلسلات ؟
عربي : تخلف × جهل × فى استفزاز ..
اجنبي : معظمها سواء بقي رومانسية اكشن عفاريت زرق تعتبر خيال علمي
طبعا ماننساش ان المجد لامريكا .. ويخربيتنا يا شيخ اننا معكنين على الامريكان عيشتهم ،،

برامج ؟
عربية : تخلف × جهل × فى استفزاز ..
اجنبية : معظمها سواء بقي عن الحب عن البراكين عن الطبيخ كلام فارغ
طبعا ماننساش ان المجد لامريكا .. ويخربيتنا يا شيخ اننا معكنين على الامريكان عيشتهم ،،

مباريات كرة قدم ؟
عربية : مافيش غير الاهلي .. والباقي تخلف × جهل × فى استفزاز ..
اجنبية : مش لاقي حاجة غير كوبا امريكا ومادام ماتبعتهاش من الاول مش هعرف اتابعها فى الاخر ،،

اغاني ؟
عربية : عبارة عن افلام بورنو مصغرة وتنافس غير شريف بين الفنانات على مين تقلع اكتر من زميلتها ،،
فى مرة من المرات واحد سألني عن رأيي فى قناة مزيكا ،،
قلتله شوف انا هقولك على حاجة ..
لو مطربة : تأكد مليون فى المية انها قدمت تنازلات ضخمة جدا ،، وكل ماتقدم تنازلات اكتر كل ما المنتج ينبسط و يعملها مع اول تنازل فيديو كليب مع تاني تنازل البوم كله كلام فارغ مع تالت تنازل يعملها فيلم و يسقط ،،
- طب مع رابع تنازل ايه يحصل ؟
لا مافيش رابع تنازل ..
- ليه هي هتتوب ..
لا هيكون المنتج شافله واحدة تانية تتنازل ..

ولو مطرب : فأكيد مش هيقدم تنازلات يعني ،،
فنقدر نقول ان معاه فلوس وعاوز يقرفنا بصوته من خلالها ..
تنفيذا لقاعدة : معايا فلوس ادوس على الرقاب و النفوس ،،
وبما انه مش هيطول لا رقابينا ولا نفوسنا فمافيش مانع يدوس على ودانا بالصداع اللى بيغنيه ويعبيهولنا فى شرايط تشتريها من الصيلدية فى عرض خاص مع اى شريط اسبرين ..

طب لو اغاني اجنبي : ماهو الطبيعي انى مابفتحش القنوات اللى فيها اغاني عربي ،،
يبقي طبيعي انى مش هعرف اشوف الاجنبي
خصوصا انى مش من محبي التقليب بين الاقمار الصناعية ..

خلاص انا عرفت وقررت انا هتفرج على ايه ،،
انا هتفرج على اعلانات !!

بحس احيانا ان دارسي الادارة بيقعدوا قدام التليفزيون يتفرجوا ع الاعلانات
ينادي الراجل من دول ابنه
- يا واد يا صبحي
- ايوه يابابا ..
- انت بتعمل ايه
- بتفرج على اعلان سمنة روابي يابابا ،،
عندي بكرة امتحان .. ادعيلي دعوة بطعم و ريحة السمن البلدي ،، !!

طبعا الاعلانات عندنا دونا عن كل الاعلانات اللى فى الدنيا ليها هدف تاني غير كل الاهداف اللى بتحطها اى شركة فى العالم
الهدف عندنا هو ازاي نفرض عليك المنتج ،،
يفضلوا ليل ونهار

اشتري بسكوت ام سلوي
اشتري بسكوت ام سلوي
اشتري بسكوت ام سلوي

وكنوع من التغيير ،،

بسكوت ام سلوي حاليا فى الاسواق اشتريه الان
بسكوت ام سلوي حاليا فى الاسواق اشتريه الان
بسكوت ام سلوي حاليا فى الاسواق اشتريه الان

لو فكرت تنام شوية ،،

- انت ماشتريتش بسكوت ام سلوي ليه ..
- انت ماشتريتش بسكوت ام سلوي ليه ..
- انت ماشتريتش بسكوت ام سلوي ليه ..

ولو فكرت تشرب كوباية شاي تحس ان فيه واحد واقف جنب ودانك بيقول ،،

- وجايلك قلب يا مفتري انك تشرب شاي من غير مايكون معاه بسكوت ام سلوي ..
- وجايلك قلب يا مفتري انك تشرب شاي من غير مايكون معاه بسكوت ام سلوي ..
- وجايلك قلب يا مفتري انك تشرب شاي من غير مايكون معاه بسكوت ام سلوي ..

يفضل يزن على ودانك
لغاية مايوصلك لمرحلة انك تشد فى شعرك وتبقي زي يوسف داوود او على اقل تقدير دارك مان ( ليونكسر ) ،،
- والله العظيم هشتري بسكوت سلوي وام سلوي وعيلة سلوي كلها بس ارحموووووووووووني !!

طبعا ماننساش ان احنا فى مصر وعربيا وحصريا
انفردنا عن كل انحاء العالم ان عندنا 10 فقرات اعلانية خلال اى حدث سواء رياضي او فني او افلام او اى شيء
وهقولك انا ليه ،،
مثلا مباراة الاهلي و الزمالك ..

10 ساعات اعلانات قبل المباراة
10 بعد المباراة ،
اعلانات على شاشة المباراة غالبا مابتشوفش اللعيبة بسببها ،،
اعلانات وهمية خلف المدرجات وخلف المرميين .. وتلاقي عبد المنصف معدي من خلالها تقول بسم الله الرحمن الرحيم ،، عبد المنصف راكبه عفريت من شركة كوكاكولا يا جدعان !!
اعلانات بين الشوطين
اعلانات بين الشوطين الاضافيين ،، رغم انهم ديروا الكورة و لعبوا علطول ،،
فانلات اللاعبين
اصرار المعلق ان ده اسمه كاس اتصالات ..
سبحان الله الارسال اتقطع وجه مكانه اعلانات ،،
ونعتذر لهذا العطل الفني ،،

لكن من ضمن هوجة الاعلانات دي اللى تجيل الملل هي كمان و الشلل ،،
اعلانات 0900
بجد حاجة غريبة جدا
فين الرقابة على التهريج ده ،،
استغلال رهيب لفلوس الناس وعبط الشباب ( اعتذر للفظ الغير مناسب )

- اتصل الان لتحصل على عروسة ممتازة . :

- اتصلي الان عزيزتي لتحصلي على عريس لقطة . ومع العريس لوف استحمام رائع العرض ساري حتي نفاذ الكمية و عقبالكم ياحبايب .

- اتصل الان لتحصل على شقة فى المهندسين
وشاليه فى مارينا
وفيلا فى شرم

- اتصلي الان عزيزتي لتحضير اشهي الاكلات والوجبات
وشعارنا دائما ،،
( قل لن يصيبنا الا ماكتبه الله لنا ) ..

- اتصل الان لتحصل على مقبرة على مقاسك وربنا يجعلها اخر الاحزان ،،

- اتصلي الان عزيزتي علشان تظبطي معانا الطقم اللى هتقابلي بيه البوي فريند بتاعك فى سيتي ستارز ،،

- اتصل الان و اربح 50 الف دولار ماهي عاصمة مصر : هي القاهرة ؟ باريس ؟ موسكو ؟
( وابقي قابلني لو كانت القاهرة هي الاجابة الصحيحة ) ..

- اتصلي الان عزيزتي واحصلي على طقم حلل ممتازة ومعاها فرخة هدية ،،
سؤالنا النهاردة ،،
ياتري ايه هو الكائن اللى كلنااااااا كبنات بنحلم اننا نتجوزه ( الرجل - الحمار - الخروف )
طبعا ماتحاوليش تختاري الراجل لان الاجابة غلط ..

طبعا ماننساش الكوول توون ،،
اللى الحقيقة بتخنق منها جدا
انا مثلا مضايق ومودي مش مظبط ،،
ماعنديش استعداد انى اجي اتصل بواحد الاقي اللى بيقول فى وداني
اجمل نسواان الدنيا فى عيووني انااااااااا ..
ياعم ده وقتك انت وستاتك ،،
ربنا يخليهوملك يا سيدي ..

وكمان ماننساش دلع موبايلك ،،
مع احدث النغمات ،،
روشن موبايلك
:: واتفشخر على كل اصحابك ،، مع نغمة ::
- ايها الراقدون تحت التراب ،، موسيقار الاجيال محمد عبد الوهاب ..

ليه بيقولوا على الشعب المصري مش لاقي ياكل
رغم كل تبذيرنا على مسابقات التليفون
سؤال مش لاقيله اجابة ..
اللى يعرف الاجابة يتصل على ( 0900 زيرو زيرو مافيش ،، اتصل بيه ماتلاقينيش )

فى الاخر بقول كل واحد يدخل يقولى بيقضى الوقت الملل ولما يكون زهقان بيعمل ايه ؟

الموضوع كله (هزار X هزار))ومحدش يزعل منى

وياريت كل واحد يقول رئيه فى مواضيعى

والسلام عليكم ورحمه الله وبركاته

__________________